Os días 14 e 15 de marzo, o alumnado da Facultade de Ciencias Empresariais e Turismo e especialmente os profesionais do eido turístico galego ten dúas citas no campus de Ourense. Baixo a coordinación de José Antonio Fraiz, director do Máster Universitario en Dirección e Planificación do Turismo Interior e de Saúde da Universidade de Vigo, a facultade acollerá a presentación dos últimos datos dos observatorios estatais de turismo rural e de turismo de benestar, que ofrecerán unha radiografía da situación de cada un destes sectores. A ocasión tamén será aproveitada para contribuír á formación dos profesionais e futuros profesionais e para estreitar os lazos entre o eido empresarial e institucional e o académico.